{"url":"https://nerdpool-api.acdh-dev.oeaw.ac.at/api/ner-sample/53082/?format=json","ner_text":"Folgenndts dienstags nach mittage habenn die anwesennde graven der augspurgischen confession unnd der abwesennde gesanndte inn des wolgebornnen graven Joachims zu Orttennburg losamennt ein zusamenkunfft gehabt, inn welcher erstlich wolermelter grave Joachim furbracht unndt angezeigt, was grosse beschwerungen seiner gn. unnd derenn unnderthonen vonn dem hertzogen inn Beyern begegnenn unnd zustehe, auch sich nach täglichenn hauffenn, wie er dann dessenn die anwesennde hern graven hievor bericht unndt auch die acta an ettliche kraiß gravenn der augspurgischen confession, sonnderlich aber die hernn wetterauische graven verschickt hette. Verhofft derohalben, man würde solcher sachenn guet wissennschafft dragenn. Nach dem aber numehr auch an die gemeine stennde deß heyligen Reichs solcher seiner beschwerung halbenn supplicirt unndt solche supplicationes inn die drey unnderschiedliche räthe zu ubergebenn unndt verleßenn zulassennn, dem mainzischen canntzler, Dr. Christoff Fabernn zugestelt hette, unndt dann auch inn willen wehre bey der ksl. Mt. gleicher gestalt supplicando abermalß anzuhaltten, so pätte er, mann woltte ime darinn freundlichen beistannd leisten unnd fur thuen, das ime möchte zu lenngst wolerlangtem rechten einßmals verhelffen werdenn. Daruff die graven unnd gräventliche gesanndten, deßgleichen auch ich, vermög derenn mir vonn euer gn. zugestelten innstruction sich ganz gutwillig erpottenn.","ner_sample":{"text":"Folgenndts dienstags nach mittage habenn die anwesennde graven der augspurgischen confession unnd der abwesennde gesanndte inn des wolgebornnen graven Joachims zu Orttennburg losamennt ein zusamenkunfft gehabt, inn welcher erstlich wolermelter grave Joachim furbracht unndt angezeigt, was grosse beschwerungen seiner gn. unnd derenn unnderthonen vonn dem hertzogen inn Beyern begegnenn unnd zustehe, auch sich nach täglichenn hauffenn, wie er dann dessenn die anwesennde hern graven hievor bericht unndt auch die acta an ettliche kraiß gravenn der augspurgischen confession, sonnderlich aber die hernn wetterauische graven verschickt hette. Verhofft derohalben, man würde solcher sachenn guet wissennschafft dragenn. Nach dem aber numehr auch an die gemeine stennde deß heyligen Reichs solcher seiner beschwerung halbenn supplicirt unndt solche supplicationes inn die drey unnderschiedliche räthe zu ubergebenn unndt verleßenn zulassennn, dem mainzischen canntzler, Dr. Christoff Fabernn zugestelt hette, unndt dann auch inn willen wehre bey der ksl. Mt. gleicher gestalt supplicando abermalß anzuhaltten, so pätte er, mann woltte ime darinn freundlichen beistannd leisten unnd fur thuen, das ime möchte zu lenngst wolerlangtem rechten einßmals verhelffen werdenn. Daruff die graven unnd gräventliche gesanndten, deßgleichen auch ich, vermög derenn mir vonn euer gn. zugestelten innstruction sich ganz gutwillig erpottenn.","entities":[[144,174,"PER"],[244,257,"PER"],[369,375,"LOC"],[966,987,"PER"]]},"ner_ent_exist":true,"ner_ent_type":"LOC,PER","ner_source":"https://nerdpool-api.acdh-dev.oeaw.ac.at/api/ner-source/7/?format=json"}