{"url":"https://nerdpool-api.acdh-dev.oeaw.ac.at/api/ner-sample/51939/?format=json","ner_text":"Unnd ist darbei durch unß, so auch negst unß durch der statt Ach Aachen gesandten die beschwerlichkaitt, verderb unnd nachthaill, so ein zeit von jharen durch das ksl. muntzedict sowoll dem gemeinen guthe der stetten unnd stende deß kraiß alß auch sonderbaren personen, hendlern und underthanen zugefugtt worden, nach der lengde referirt mit ferer ausfurungh, das sollich ksl. muntz edict und ordnungh zuhalten den stenden des niderlendischen und westphalischen kraiß zu verhuetungh mereren verderbenß und besorgenden ufstandtz gantz unmuglich, es wurde dan die regierungh in Niderlandt irer hochersteigerten gulden unnd silbern muntzen gepurender reduction thun unnd hinfurter sich mit den stenden des hl. Reichs (wie sie anno 66 zu Augßpurg zugesacht) in gleichem gewicht, schrott, korn unnd gehaltt muntzen unnd ire Philipsthaller mit seinen abgetheilten sorten hinfurter ungemuntzt laßen. Dan einmall, so dem nit folge beschege, wurden die stende des westphalischen kraiß (wie dan in uberreichter schrifften notturfftigh angezogen unnd jeder zeit uf reichs und andern deputation tagen auch gethan hetten) wegen angerechter unmuglichkaitt und vurderbungh irer underthanen sich notturfftigh betzeugen. Sie wolten es aber darfur haltenn, da die ksl. Mt. und gemeine stende sich gnedigste, gnediglich und gunstigh erinneren werden, das und diweill den reichs muntzen in den niderburgundischen und andern benachpaurten landen ein hohern werdt unnd aestimation geben, das dardurch des hl. Reichs muntzen auß dem Reich verfurtt unnd andere geringere sortenn hereinpracht, ire ksl. Mt., chur unnd f. gn. werden andere mitlen finden, dardurch der reichs muntz im Reich pleiben, auch landt sorten nach eins jeden kraiß notturfft geschlagenn unnd frembde in hoheren werdt eingeschlichene sorten abgeschafft, aber fur allen dingenn dahin bedacht zusein, daß die burgundische regirungh, weill die furnembste hantirung teutschen nation in die Niderlandt feldt zu gleicher handthabungh und haltungh der muntz vermocht werde.","ner_sample":{"text":"Unnd ist darbei durch unß, so auch negst unß durch der statt Ach Aachen gesandten die beschwerlichkaitt, verderb unnd nachthaill, so ein zeit von jharen durch das ksl. muntzedict sowoll dem gemeinen guthe der stetten unnd stende deß kraiß alß auch sonderbaren personen, hendlern und underthanen zugefugtt worden, nach der lengde referirt mit ferer ausfurungh, das sollich ksl. muntz edict und ordnungh zuhalten den stenden des niderlendischen und westphalischen kraiß zu verhuetungh mereren verderbenß und besorgenden ufstandtz gantz unmuglich, es wurde dan die regierungh in Niderlandt irer hochersteigerten gulden unnd silbern muntzen gepurender reduction thun unnd hinfurter sich mit den stenden des hl. Reichs (wie sie anno 66 zu Augßpurg zugesacht) in gleichem gewicht, schrott, korn unnd gehaltt muntzen unnd ire Philipsthaller mit seinen abgetheilten sorten hinfurter ungemuntzt laßen. Dan einmall, so dem nit folge beschege, wurden die stende des westphalischen kraiß (wie dan in uberreichter schrifften notturfftigh angezogen unnd jeder zeit uf reichs und andern deputation tagen auch gethan hetten) wegen angerechter unmuglichkaitt und vurderbungh irer underthanen sich notturfftigh betzeugen. Sie wolten es aber darfur haltenn, da die ksl. Mt. und gemeine stende sich gnedigste, gnediglich und gunstigh erinneren werden, das und diweill den reichs muntzen in den niderburgundischen und andern benachpaurten landen ein hohern werdt unnd aestimation geben, das dardurch des hl. Reichs muntzen auß dem Reich verfurtt unnd andere geringere sortenn hereinpracht, ire ksl. Mt., chur unnd f. gn. werden andere mitlen finden, dardurch der reichs muntz im Reich pleiben, auch landt sorten nach eins jeden kraiß notturfft geschlagenn unnd frembde in hoheren werdt eingeschlichene sorten abgeschafft, aber fur allen dingenn dahin bedacht zusein, daß die burgundische regirungh, weill die furnembste hantirung teutschen nation in die Niderlandt feldt zu gleicher handthabungh und haltungh der muntz vermocht werde.","entities":[[61,64,"LOC"],[65,71,"LOC"],[576,586,"LOC"],[723,730,"DATE"],[734,742,"LOC"],[1933,1943,"LOC"]]},"ner_ent_exist":true,"ner_ent_type":"LOC,DATE","ner_source":"https://nerdpool-api.acdh-dev.oeaw.ac.at/api/ner-source/7/?format=json"}